ابدأ طريقك للحرية المالية من هنا:
كام مرة سألت نفسك قبل الشهر ما يخلص "الفلوس خلصت على ايه؟"
طيب كام مرة جربت تعمل.. احم احم.. ميزانية؟
ايوه عندك حق كلنا متفقين انها كلمة مستفزة شوية، سواء كانت ميزانية أو budget - في الحقيقة هي مش من الكلمات المفضلة عند حد!لكن بمناسبة كلمة budget انتوا عارفين انها جاية من كلمة bougette بالفرنساوي؟وهي شنطة بيحطوا فيها الفلوس في القرن الـ15،كانوا بيتسخدموها زي شنطة الوسط دلوقتي كدة. تخيلوا؟!لحد ما في سنة 1880 اخترعوا كلمة budget للتعبير عن إدارة الأموال الشخصية، وخلاص دخلت القاموس الإنجليزي.وبالعربي ميزانية جاية من كلمة الميزان، اللي لو الواحد طبقها على فلوسه هيقدر يوازن بين احتياجاته ورغباته بشكل سليم.
ودلوقتي في 2024 الميزانية بقى ليها تعريف واضح وهيكل أو إطار، عنده اكتر من نموذج علشان يناسب الاحتياجات المختلفة لكل شخص، فتبقى ميزانيته متفصلة عليه هو وعلى أسلوب حياته وأهدافه.
ده غير الأنظمة والتطبيقات المختلفة الكتير اللي تقدر تساعدك على تفصيل ميزانيتك أونلاين، لكن لأ لسة برضه كلمة ميزانية دي تقيلة على قلب الراحد وبتحسسه انه متقيد كدة!والحقيقة ان طول ما الكلمة دي مش مريحاك هتفضل حاسس انك منفصل عنها ومش عايز تطبقها، بل بالعكس، هتشوفها عبأ عليك عايز تهرب منه.
كلمة الميزانية - اللي محدش بيحبها دي - هي بإختصار: حسبة تقديرية للفلوس اللي بتكسبها قدام الفلوس اللي بتصرفها.
فاللي بتعمله انك بتاخد المعطيات دي وتبدأ تاخد قراراتك بناءً عليها
.سواء كان قرارك انك مجرد تعادل بين الفلوس اللي بتكسبها والفلوس اللي بتصرفها، أو تحوّش أو تعمل استثمار.
ماتتوقعش انك هتطلع بميزانية مظبوطة 100% (وما تخُرّش الماية) من من أول مرة. في الحقيقة انت بتفضل تعمل تعديلات وتغيرات طول ما انت في الطريق، لان كل ما بتتعلم تلتزم بيها أكتر، كل ما بتتعرف على طريقتك في صرف الفلوس، وكمان بتتعرف أكتر على احتياجك. وزي أي حاجة بتتعلمها جديد - هتلاقي نفسك بتتحسن في تطبيقها بمرور الوقت.
وطبعا دلوقتي في حد ممكن يتخيل انه مش محتاج/بيحب يعمل ميزانية او يجي في دماغك جملة زي "انا بكره الأرقام" ، "شغلي مضمون" ، "انا أصلاً معنديش ديون، اعمل ميزانية ليه!" ، "بحب ادلع نفسي، محدش واخد منها حاجة" الموضوع محتاج إرادة" ، "انا مش عارف اتغير.." 🎶أو مثلاً..
والحقيقة ان كل دي أفكار في دماغنا نابعة من الخوف من التغيير- أو احساسنا اننا هنحرِم نفسنا من حاجة - فبنلاقي نفسنا تلقائي بنعَيّب على الميزانية أوعاملينها قصة عظيمة وموضوع كبير في دماغنا!
علشان من واحنا صغيريين كلمة "الميزانية" مرتبطة بحرماننا من حاجة بنحبها. لكن العكس هو الصحيح، الميزانية هي اللي بتساعدك تجيب الحاجة اللي بتحبها لإنها بتخليك فعّال أكتر في تحقيق أهدافك، ده غير انها بتساعدك تتجنب الديون، وتتخلص من المصاريف اللي ملهاش لازمة، فهتلاقي ان اللي بيتبقالك في الاخر هي الفلوس اللي نفسك تصرفها على الحاجات اللي بتحبها بجد!
-بجد؟
=بجد الجد!
أول خطوة في طريق الميزانية، انك تراقب الطريقة اللي بتصرف بيها الفلوس، وتسجل كل حاجة.
كتير مننا بيخاف يواجه الحقايق اللي هيعرفها عن نفسه لما يسجل كل جنيه بيصرفه، فمبدأيا كدة انت محتاج تغير طريقة تفكيرك وتحوله من الشعور بالذنب وتأنيب الضمير بتاع "انا عارف اني هكتشف كمية مرعبة من الحاجات التافهة اللي بصرف عليها فلوسي" لـ "انا عايز اعرف فلوسي بتروح فين بالظبط؟" خلي الفضول ياخدك وشغّل روح المحقق اللي جواك - هتستفيد منه كتير على فكرة.
انت كدة كدة بتعمل حساب للأكل الجاهز والـ junk food اللي بيدخل جسمك على مدار الشهر، وبتعمل وقت تقعد فيه قدام شاشة الموبايل حتى لو تعبان او ماعندكش وقت، وقيس على كدة عادات كتير غير صحية، بتاخد مننا وقت ومجهود وفلوس وحتى صحة واحنا بنتعامل معاها انها مجانية أو مش مكلفة، لكن المفاجأة، إننا بنموّل (وبندعم) كل عادة غير صحية من فلوسنا الشخصية!
عشان كدة احنا محتاجين نسجل ونركز في كل ده علشان نفهم احنا بنصرف قد ايه على العادات دي. فاحسب وسجل مصاريفك بنية تحسين أسلوب حياتك وبعقلية تحديد الحاجات اللي بتعطلك عن تحقيق أهدافك علشان تبعدها عن طريقك.
الميزانية مش معناها انك تصرف قليل على قد ما تقدر، لكن معناها انك تصرف بوعي وكمان معناها انك تعمل نظام صحي، متكونش فيه مديون، وتقدر تحّوش، و-مين عارف- ما يمكن تقدر تستثمر الفلوس اللي حوشتها - لكن دي مواضيع تانية يطول شرحها هنوضحها بتفصيل أكتر في المقالات اللي جاية.
احنا في فلاش عندنا هدف معين وهو "دعم الحياة المالية الصحية لمجتمعنا، علشان كل فرد ياخد فرصته"
لو استفدت من المقال ده وعايز تدي فرصة للميزانية تدخل حياتك، هتلاقي تحت لستة بالمواضيع اللي فلاش هيتكلم عنها خلال الفترة الجاية، علشان يسهل عليك فهم وإدارة أموالك، فاتأكد من تحميل التطبيق وهيجيلك تنبيه أول ما مقالة جديدة تنزل، أو اعملنا متابعة على انستجرام علشان تبقى عارف دايماً ايه الجديد.
⚪️ أساسيات الميزانية ( ألف باء ميزانية ) - فلوسي بتروح فين؟
⚪️ ازاي تسجل مصاريفك - للمبتدئين
⚪️ هو موضوع "الميزانية" ده صعب أوي كدة؟ / هل صحيح الميزانية صعب تطبيقها في الواقع؟
⚪️ اغلبنا بيقع في الأخطاء دي لما نيجي نعمل ميزانية
⚪️ ازاي تنجّح ميزانيتك؟
⚪️ ازاي تفضل ملتزم ومتحمس - (الموضوع مش كميا) (الموضوع أسهل من السهولة!
⚪️ بتاخد قرارات متهورة وانت بتشتري؟ - اعرف عدوك
⚪️ بتدور على شريك المسؤولية المناسب ليك؟ - لما تفهم هتعرف
⚪️ نماذج للميزانية - اعرف ازاي تختار المناسب لأسلوب حياتك